Hawaii·July 18, 2026· Originally published July 13, 1881Mai ke Alii ka Moi mai (Mai Singapore Mai)A Letter From The King (From Singapore)Ka Elele Poakolu4 min readRead the originalTap any paragraph to peek at the English.Ua hauoli makou i ka haawi ana aku i keia mau huaolelo malalo iho imua o ka lahui, i kakau ponoi ia e kona lima alii a hoouna mai la e au maluna o ka ilikai moana kawa a loaa Kona Moiwahine KAPIOLANI; a ma o ka lokomaikai o ka Moiwahine, ke panee aku nei makou i kekahi hapa o na olelo Alii. — Singapore, Poaha, Mei 12, 1881.Ke haalele nei i keia wahi no ka maau hou aku i Penang a hiki aku i Rangoon a me Calcutta. Ua hele aku nei makou e ike i ka Maharaja o Iahoa.He alii maikai keia; he wahi helehelena like iki me ko Leleiohoku mua o ke kakaa ole hoi ka hewa o ko ia nei maka.Nani a maikai kona aupuni a me kona Hale Alii. Ua hookipa ia makou me na oihana ihiihi o ko Inia nei mau alii, a me ko lakou mau kahiko.Ua hoouna mai oia i kona mokuahi uuku no makou, a i ke kakahiaka Poalua hora 7 1-2, ua hele aku a hiki malaila i ka hora 11 1-2. Hele mai la na kaikaina o ua 'lii nei iluna o ka moku ahi, maluna lakou o na waapa ahi, e hookipa ia'u.Lele aku la makou iuka me ko makou mau kahiko piha, a pii aku la he anuu, a anuu hou, alaila iho mai la ua 'lii nei me kona mau kahiko piha me kona mau alii. Ia'u kekahi mamalu alii, a hele okoa mai no hoi kela a halawai maua a lulu lima.Ia'u i lele mai ai, hele mai la na kaikaina o ua 'lii nei ma kuu aoao a hiki i ko maua halawai ana me ka Maharaja. Hookipa mai la kela ia'u i kona mau alii oia no na kaikaina ona.O ka ili a me ka helehelena o keia mau alii ua like loa no me kakou. E like no me kuu olelo pinepine ia oe.Pau ka hookipa ana, paina liilii iho la makou. Pau ka paina liilii ana, pahupahu iho la maua.I ko maua paani ana i ke kemu mua make au ia i ala, aka, i ke kemu alua iho hoi make ia'u. Pau ko makou lealea ana, hele mai la makou a ma ka lanai ma kahi e pa mai ana ka makani, malaila ko makou noho ana.Hele makou, e hoikeike mai ua 'lii la i ka mala kope ana i kanu ai, a me kekahi mau mea kanu ae. He alii mahiai keia a hooulu hana i mea e pomaikai ai kona aupuni a me kona lahui.He alii akamai i ke kalai aina a noiau no hoi. Ua haawi oia i kona mau alii i mahele o kona mau aina e mahi pu me ia.Olelo mai kela ia'u i kona mahalo i ka pake i ka ikaika i ka hana.Nui na laau i kamaaina ia kakou e ulu nei maanei. O ka hau, milo, kamani haole, kamani Hawaii, ka ieie, ka pali, ka hala, ka ohia, a maanei ke kanu ia no ke kalo e na kamaaina a me na pake.O ka raiki nae ka ai nui a keia lahui kanaka e like no me ko Inia, Iapana a me Kina. E loaa ana ia kakou kekahi mau hua ono o keia aupuni oia ka Mangostine.Opala ka nui maanei a ko makou wai e inu iho la ia i na la a pau me ka hau i huihui.I kekahi la ae hoi mai makou ma na kaa, he wa pokole he hookahi hora me ka hapa hiki hou makou i Singapore. I ka po ana iho hele makou e komo hou o ka hale i ka hui malu.A i keia la ke haalele nei i keia hora 4 no Penang.KALAKAUA.Pau · EndMore from Haumana NewsKukakuka · Discussion0
